Сделать стартовой  |  Добавить в избранное 

Пасха. Информационный проектИнформационный сайт Казанской епархии

О Пасхе : : Двунадесятые Праздники : : Великие Праздники : : О Постах : : О Великом Посте : : Полезные статьи : :

 
  На главную Всемирное Воздвижение Честнаго и Животворящаго Креста Господня.

 

 

 

 

 

 

 

 





Месяца септемвриа в 14-й день

Всемiрное Воздвижение Честнаго и Животворящаго Креста Господня

И успение во святых отца нашего Иоанна, архиепискоа Константиня града, Златоустаго.

Ведомо же буди, яко Златоустаго возследование в сей пресветлый день, в Константине граде, и повсюду не поется Воздвижения ради Честнаго Креста, Господьскаго праздника, и преложися в 13 день ноемвриа месяца.

На малей вечерни,

на Господи воззвах, стихиры на 4, глас 1.

Подобен: Небесных чинов:

Крест возносится, и демони прогоняются, разбойник Едема убо врата отверзает, смерть умерщвляется, и ныне пуста явися, Христос величается. Тем веселитеся вси земнороднии, клятва разрушися. [Дважды.]

Приидите боголюбивии вси, Крест честный возносимый видяще, возвеличим купно, и славу дадим, Единому Избавителю и Богу взывающе: Распныйся на Древе Крестнем, не презри молящихся нас.

Горесть древле ослаждая Моисей, избави Израиля, образом Крест прописуя: мы же сего вси божественно вернии, таинственно воображающе в сердцах наших всегда, спасаемся державою его.

Слава, и ныне, глас 6. Самогласен:

Днесь сад животный, от земных незаходимых недр происходит: на нем пригвожденнаго Христа извествует Воскресение, и воздвизаемый руками священническими, Того на небеса возвещает возношение: Имже наше смешение, от еже на землю падения, на небесех жительствует. Темже благодарственне возопиим: Господи, Вознесыйся на нем, и тем совознес нас, небесныя Твоея радости сподоби, яко Человеколюбец.

Прокимен дне, и Сподоби Господи:

На стиховне стихиры, глас 2:

Подобен: Доме Евфрафов:

Водою Боготворною и кровию Твоею Слове, светло Церковь украшается, яко невеста, Креста славу поющи.

Стих: Возносите Господа Бога нашего, и поклоняйтеся подножию ногу Его, яко свято есть.

Копие со Крестом, гвозди и иная, имиже живоносное Христово пригвоздися тело, возносяще поклонимся.

Стих: Бог же Царь наш прежде века, содела спасение посреде земли.

Егда Амалика Моисей побеждаше, на высоту руце имея крестоявленно, образоваше Христову страсть пречистую.

Слава, и ныне, глас 6:

Днесь Древо явися, днесь род еврейский погибе, днесь верными цари вера является, и Адам древа ради испаде, и паки Древом демони вострепеташа: всесильне Господи, слава Тебе.

Тропарь, глас 1:

Спаси Господи люди Твоя, и благослови достояние Твое, победы православным христианом на сопротивныя даруя, и Твое сохраняя Крестом Твоим жительство.

По отпущении же Малыя вечерни входит екклисиарх со иереем и диаконом, и параекклисиархом в жертвенник со свещами, и облачится иерей, и диакон, и кадив честный Крест, глаголет: Благослови владыко. Иерей: Благословен Бог наш: Таже, Трисвятое, и по Отче наш, тропарь Креста: Спаси Господи люди Твоя: Слава, и ныне, кондак. И взимает иерей честный Крест с блюдом на главу, и вносит его во святый олтарь: предыдущим же пред ним со двема лампадама, и полагает честный Крест на святой трапезе, на евангельском месте: и вжигают пред ним свещу на всю нощь, а Евангелие поставляется на Горнее место.

Подобает ведати, яко аще случится праздник сей в неделю, ничтоже поется воскресно, ни стихиры воскресны, ниже непорочны, ни степенна гласа: ни Евангелие воскресно чтется, точию, Воскресение Христово: глаголем, не поется же и Свят Господь Бог: но поем всю службу праздника.

На велицей вечерни.

Аще в субботу вечера, поем Блажен муж: кафисму всю.

Аще же в неделю вечера, поем Блажен муж, первый антифон.

Аще ли во иный день, Блажен муж: не поем, но по предначинательном псалме поем: Господи, воззвах, на глас 6.

И поем стихиры, глас 6.

Подобен: Все отложше:

Крест воздвизаемь, на нем Вознесеннаго страсть пречистую, пети повелевает твари всей. На том бо убив нас убившаго, умерщвленныя оживил есть, и удобри, и на Небесех жити сподоби яко Милосерд, премножеством благости. Тем радующеся, вознесем Имя Его, и Того возвеличим крайнее снизхождение. [Трижды]

Моисей предобрази Тя, руки простер на высоту, и побеждаше Амалика мучителя, Кресте Честный, верных похвало, страдальцев утверждение, апостолов удобрение, праведных поборниче, всех преподобных спасителю. Тем тя воздвизаема зрящи тварь, веселится, и торжествует славящи Христа, Тобою разстоящая собравшаго, крайнею благостию. [Трижды]

Кресте Пречестный, егоже обстоят чини ангельстии веселящеся, днесь воздвизаемь, Божественным мановением возносиши вся, окрадением снеди отгнанныя, и в смерть поползшияся. Темже тя сердцы и устнами вернии лобызающе, священие почерпаем, возносите, вопиюще, Христа Преблагаго Бога, и Того покланяйтеся Божественному подножию. [Дважды]

Слава, и ныне, глас 2:

Приидите вси языцы, благословенному Древу поклонимся, имже бысть вечная правда. Праотца бо Адама прельстивый древом, крестом прельщается: и падает низвержен падением странным, мучительством одержавый царское здание: кровию Божиею яд змиев отмывается, и клятва разрушися осуждения праведнаго, неправедным судом праведнику осуждену бывшу: древом бо подобаше древо исцелити, и страстию Безстрастнаго яже на древе разрешити страсти осужденнаго. Но слава Христе Царю, еже о нас Твоему мудрому смотрению, имже спасл еси всех, яко Благ и Человеколюбец.

Вход: Прокимен дне.

Аще случится праздник сей в субботу: в пяток вечера прокимен дне оставляется, и поется прокимен великий, глас 7: Бог наш на небеси и на земли, вся елика восхоте, сотвори. Понеже в субботу вечера поется прокимен: Господь воцарися: И чтения.

Исхода чтение. [Главы 15 и 16.]

Поят Моисей сыны Израилевы от моря Чермнаго, и веде тыя в пустыню Сур: и идяху три дни в пустыни, и не обретаху воды, да быша пили. Приидоша же в Мерру, и не можаху пити воды из Мерры, горька бо бе: сего ради наречеся имя месту тому, горечь. И роптаху людие на Моисеа, глаголюще: что пием? Возопи же Моисей ко Господу, и показа ему Господь древо: и вложе тое в воду, и сладка бысть вода. Тамо пложи ему Бог оправдания и суды. И тамо искушаше его, и рече: Аще слухом услышиши глас Господа Бога твоего, и угодная пред Ним сотвориши, и внушиши заповеди Его, и сохраниши вся оправдания Его, всяку болезнь, юже наведох Египтяном, не наведу на тя: Аз бо есмь Господь исцеляяй тя. И приидоша во Елим, и бяху тамо дванадесять источников вод, и седмьдесят стеблей финиковых: и ополчишася тамо при водах. И воздвигошася от Елима, и прииде весь сонм сынов Израилевых в пустыню Син, яже есть между Елимом и между Синою.

Притчей чтение. [Глава 3.]

Сыне, не пренебрегай наказания Господня, ниже ослабевай от Него обличаемый. Егоже бо любит Господь, наказует: биет же всякаго сына, егоже приемлет. Блажен человек, иже обрете премудрость, и смертен, иже уведе разум. Лучше бо сию куповати, нежели злата и сребра сокровища. Честнейшая же есть камений многоценных, не сопротивляется ей ничтоже лукавое, благоразумна есть всем любящим ю: всякое же честное недостойно ея есть. Долгота бо жития, и лета жизни в деснице ея. В шуйце же ея богатство и слава: из уст ея исходит правда, закон же и милость на языце носит. Путие ея, путие добры, и вся стези ея с миром. древо живота есть всем держащимся ея, и восклоняющимся на ню, яко на Господа, тверда.

Пророчества Исаиина чтение. [Глава 60.]

Сия глаголет Господь: отверзутся врата твоя Иерусалиме выну день и нощь, и не затворятся, еже ввести к тебе силу языков, и цари их ведомыя. Языцы бо и царие, иже тебе не поработают, погибнут: и языцы запустением запустеют. И слава Ливанова к тебе приидет в кипарисе, и певке, и кедре вкупе, прославити место святое Мое, и место ног Моих прославлю. И пойдут к тебе боящеся сынове смиривших тя, и прогневавших тя, и поклонятся следом ног твоих вси прогневавшии тя, и наречешися град Господень, Сион Святаго Израилева. За еже быти тебе оставлену, и возненавидену, и не бе помогаяй тебе: и положу тя в радость вечную, веселие родом родов. И иссеши млеко языков, и богатство царей снеси, и разумееши, яко Аз Господь спасаяй тя, и избавляяй тя Бог Израилев.

На литии стихиры самогласны, глас 1.

[Андреа Иерусалимскаго:]

Днесь яко воистинну святовещанный глагол Давидов конец прият: се бо яве пречистых ног Твоих покланяемся подножию, и на сень крилу Твоeю надеющеся, Всещедрый, вопием Ти: да знаменуется на нас свет лица Твоего. Православных людей Твоих рог вознеси честнаго Креста Твоего Воздвижением, Христе Многомилостиве.

Насажденное в краниеве месте, Древо Сущаго Живота, на немже содела спасение Превечный Царь посреде земли, возносимо днесь, освящает мiра концы, и обновляется Воскресения дом: радуются ангели на небеси, и веселятся человецы на земли, Давидски вопиюще, и глаголюще: возносите Господа Бога нашего, и поклоняйтеся подножию ногу Eго, яко свято eсть: подаяй мiру велию милость.

Прообразуя Крест Твой Христе, патриарх Иаков, внуком благословение даруя, на главах пременeны руки сотвори. Eгоже Спасе, мы днесь возносяще взываем: даруй христолюбивым людем победы, яко Константину одоление.

Глас 2:

[Феофаново:] Божественное сокровище в земли скрываемо, Жизнодавца Крест на небесех показася царю благочестивому: и победы на враги подписание являет разумно. Eгоже радуяся верою и любовию, божественно востек к высоте зрения, тщанием же того от земных недр изнесе во избавление мiра и спасение душ наших.

[Киприаново:] Рук пременение патриарха Иакова на благословение чад, державное Креста Твоего предъявляше знамение. Егоже мы держаще тверда хранителя, демонския всемощно отгоним полки, и велиарову гордыню в нем низлагаем, враждебнейшаго Амалика побеждаем всегубительную силу. Того и ныне возносима благочестивомудренно, вернии, во очищение грехов, Твоей благости во многомножайшем гласе, вопиюще приносим: Господи помилуй, из Девы воплотивыйся, ущедри рук Твоих, Блаже, мудрое создание.

[Льва Деспота:] Ты мой покров державен еси, тричастный Кресте Христов: освяти мя силою твоею, да верою и любовию покланяюся и славлю тя.

Глас 4:

Восплещем днесь песненное торжество, и светлым лицем, и языком ясно возопиим: нас ради, Христе, суд приемый, и оплевания и раны, и червленицею одеявыйся, и на Крест возшед, Егоже видевше солнце и луна свет скрыша, и страхом земля колебашеся, и завеса церковная раздрася на двое: Ты и ныне даруй Крест Твой честный нам, блюстителя и хранителя, и прогонителя демонов, яко да вси облобызающе, вопием ему: спаси ны, Кресте, силою твоею, освяти ны светлостию твоею, честный Кресте, и укрепи ны воздвижением твоим, яко свет нам дарован еси, и спасение душ наших.

[Анатолиа:] Светосиянен звездами образ предпоказа, Кресте, победу одоления благочестивому царю великому, егоже мати Елена, изобретши, мироявленна сотвори: и тя днесь воздвижуще, верных лицы зовем: просвети ны светлостию твоею, Кресте живоносный. Освяти ны крепостию твоею, всечестный Кресте, и утверди ны воздвижением твоим, воздвизаемый ко ополчению врагов.

Слава, и ныне, глас тойже:

[Анатолиа:] Честнаго Креста Христе, действо прообразив Моисей, победи противнаго Амалика в пустыни Синайстей: eгда бо простираше руце, Креста образ творя, укрепляхуся людие: ныне же вещей сбытие в нас исполнися. Днесь Крест воздвизается, и демони бегают. Днесь тварь вся от тли свободися: вся бо Креста ради возсияша нам дарования. Темже радующеся вси припадаем Тебе глаголюще: яко возвеличишася дела твоя, Господи, слава Тебе.

На стиховне, глас 5.

Радуйся, Живоносный Кресте, благочестия непобедимая победа, дверь райская, верных утверждение, Церкве ограждение, имже тля разорися и упразднися и попрася смертная держава, и вознесохомся от земли к небесным, оружие непобедимое, бесов сопротивоборче, слава мучеников, преподобных яко воистинну удобрение, пристанище спасения, даруяй мiру велию милость.

Стих: Возносите Господа Бога нашего, и покланяйтеся подножию ногу Его, яко свято есть.

Радуйся, Господень Кресте, имже разрешися от клятвы человечество, сущия радости знамение, прогоняяй враги во твоем воздвижении, всечестне. Нам помощниче, крепость праведных, священников благолепие, воображаемый, и лютых избавляяй, жезл силы, имже пасемся, оружие мира, егоже со страхом обстоят ангели, Христа Божественная слава, подающаго мiру велию милость.

Стих: Бог же Царь наш прежде века содела спасение посреде земли.

Радуйся, слепых наставниче, немощных врачу, воскресение всех умерших, воздвигнувый ны во тлю падшия, Кресте честный, имже разрушися клятва, и процвете нетление, и земнии обожихомся, и диавол всеконечно низвержеся. Днесь воздвизаема тя видяще руками архиерейскими, возносим Вознесеннаго посреде тебе, и тебе покланяемся, почерпающе богатно велию милость.

Слава, и ныне, глас 8. Иоанна Монаха:

Егоже древле Моисей прообразовал собою, Амалика низложив победи: и Давид песнопевец, подножию твоему, вопия, кланятися повелеваше, честному Кресту Твоему, Христе Боже, днесь грешнии кланяемся, устнами недостойными, Тя изволившаго пригвоздитися на нем, воспевающе, молимся: Господи, с разбойником Царствия Твоего сподоби нас.

Таже, Ныне отпущаеши:

На благословении хлебов тропарь, глас 1:

Спаси, Господи, люди Твоя, и благослови достояние Твое, победы на сопротивныя даруя, и Твое сохраняя Крестом Твоим жительство. Трижды

И чтем слово о Честнем Древе.

На утрени

на Бог Господь, тропарь трижды.

По 1-м стихословии седален, глас 6:

Токмо водрузися древо Христе, Креста Твоего, основания поколебашася смерти Господи, егоже бо пожре желанием ад, отпусти трепетом, явил еси нам спасение Твое, Святый: и славословим Тя, Сыне Божий, помилуй нас.

Слава, и ныне, глас 1.

Подобен: Камени запечатану:

Креста Твоего Древу покланяемся Человеколюбче, яко на нем пригвоздился еси Животе всех. Рай отверзл еси Спасе, верою пришедшему Ти разбойнику, и сладости сподобися исповедаяся Тебе: помяни мя Господи, приими якоже онаго и нас зовущих: согрешихом вси, благоутробием Твоим не презри нас.

По 2-м стихословии седален, глас 6:

Днесь пророческое исполнися слово: се бо покланяемся на место, идеже стояша ноги Твоя Господи. И древо спасения приемше, греховных страстей свободу получихом, молитвами Богородицы Едине Человеколюбче.

Слава, и ныне, глас 8.

Подобен: Повеленное тайно:

Проображаше таинственно древле Иисус Навис Креста образ, егда руце простре крестовидно, Спасе мой, и ста солнце, дондеже враги низложи противостоящыя Тебе Богу. Ныне бо зайде на Кресте Тя зря, и державу смертную разрушив, весь мiр совоздвигл еси.

По полиелеи седален, глас 8.

Подобен: Повеленное тайно:

В раи мя прежде древо обнажи, о вкушении враг принося умерщвление, Креста же древо живота одеяние человеком нося, водрузися на земли, и мiр весь исполнися всякия радости. Егоже зряще возвышаема, Богу верою людие согласно возопиим: исполнь славы дом Твой.

Слава, и ныне, тойже.

Степенна, 1-й антифон 4-го гласа.

Прокимен, глас 4:

Видеша вси концы земли спасение Бога нашего.

Стих: Воспойте Господеви песнь нову, яко дивна сотвори Господь.

Всякое дыхание:

Стих: Хвалите Бога во святых Его:

Евангелие от Иоанна, зачало 42, от полу.

Таже: Воскресение Христово:

Псалом 50.

И стихира, глас 6:

Кресте Христов, христиан упование, заблуждших наставниче, обуреваемых пристанище, в бранех победа, вселенныя утверждение, недужных врачу, мертвых воскресение, помилуй нас.

Канон Креста, егоже краегранесие: Кресту надеявся пение отрыгаю.

Творение Кир Космы.

Ирмосы по дважды: тропари же на 12, глас 8.

Песнь 1. Ирмос:

Крест начертав Моисей, впрямо жезлом Чермное пресече, Израилю пешеходящу, тоже обратно фараоновым колесницам ударив совокупи, вопреки написа непобедимое оружие. Тем Христу поим Богу нашему, яко прославися.

Образ древле Моисей пречистыя страсти в себе самом прообрази, священных среде стоя: Крест же вообразив, простертыми победу дланьми воздвиже, державу погубив Амалика всегубителя. Тем Христу поим Богу нашему, яко прославися.

Возложи Моисей на столпе врачевство, тлетвориваго избавление, и ядовитаго угрызения: и древу образом Креста, по земли пресмыкающагося змия привяза, лукавный в сем обличив вред. Тем Христу поим Богу нашему, яко прославися.

Показа небо Креста победу благочестия держателю, и царю Богомудру, врагов в немже злосердных низложися сверепство, лесть же превратися, и вера распростреся земным концем Божественная. Тем Христу поим Богу нашему, яко прославися.

Катавасиа, оба лика вкупе: Крест начертав Моисей:

Песнь 3. Ирмос:

Жезл во образ тайны приемлется, прозябением бо предразсуждает священника, неплодящей же прежде Церкви, ныне процвете древо Креста, в державу и утверждение.

Яко испусти ударяемь воду краесекомый, непокоривым людем и жестосердым, Богозванныя проявляше Церкве таинство, Еяже Крест держава и утверждение.

Ребром пречистым, копием прободенным, вода с кровию истече, обновляющая завет и омывательная греха, верных бо Крест похвала, и царей держава и Утверждение.

Седален, глас 4.

Подобен: Скоро предвари:

В тебе, треблаженне и жизнодавче Кресте, людие учреждающеся спразднуют, с невещественными Лики, чини архиерейстии благоговейно воспевают. Множество же монашествующих и постников покланяются, Христа же распеншагося вси славим.

Слава, и ныне, тойже.

Песнь 4. Ирмос:

Услышах Господи, смотрения Твоего таинство, разумех дела Твоя, и прославих Твое Божество.

Горькородныя преложи древом Моисей, источники в пустыни древле, Крестом ко благочестию языков проявляя преложение.

Глубине внедривый секущую издаде Иордан древу, Крестом и крещением, сечение лести знаменуя.

Священно ополчаются, четверочастнии людие предходяще образом свидетельства скинии, крестообразными чинми прославляемии.

Чудно простираемь, солнечныя лучы испущаше Крест, и поведаша небеса, славу Бога нашего.

Песнь 5. Ирмос:

О Треблаженное древо, на немже распяся Христос, Царь и Господь. Имже паде древом прельстивый, тобою прельстився, Богу пригвоздившуся плотию, подающему мир душам нашим.

Тебе приснопетое древо, на немже простреся Христос, Едем хранящее обращающееся оружие, Кресте устыдеся: страшный же херувим уступи, на тебе пригвожденному Христу, подающему мир душам нашим.

Подземных силы противныя Креста страшатся, начертаема знамения на воздусе, по немуже ходят небесных и земнородных роди, колена преклоняюще Христу, подающему мир душам нашим.

Зарями нетленными явлься Божественный Крест, омраченным языком, заблужденным в прелести, Божественный свет облистав, усвояет на нем пригвожденному Христу, подающему мир душам нашим.

Песнь 6. Ирмос:

Воднаго зверя во утробе, длани Иона крестовидно распростер, спасительную страсть проображаше яве. Тем тридневен изшед, премiрное воскресение прописаше, плотию пригвожденнаго Христа Бога, и тридневным воскресением мiр просвещшаго.

Старостию преклонився, и недугом отягчен исправися, Иаков руце пременив, действие являя жизноноснаго Креста: ибо ветхость законнаго сеновнаго писания новописа, на сем плотию пригвоздивыйся Бог, и душегубительный недуг лести отгна.

На юныя возложив длани Божественный Израиль, крестовидно главы являше, яко старейшая слава, законослужители людие. Темже подмневся тако испрельститися, не измени жизноноснаго образа: превзыдут бо людие Христовы Божии новоутверждении, вопияху, Крестом ограждаеии.

Кондак, глас 4.

Подобен:

Вознесыйся на Крест волею, тезоименитому Твоему новому жительству, щедроты Твоя даруй, Христе Боже, возвесели силою Твоею верныя люди Твоя, победы дая нам на сопостаты, пособие имущим Твое, оружие мира, непобедимую победу.

Икос: Иже до третияго небесе восхищен бысть в рай, и глаголы слышав неизреченныя и Божественныя, ихже не леть языки [человеческими] глаголати. Что галатом пишет, яко рачителие писаний прочтосте и познасте: мне, глаголет, хвалитися да не будет, токмо во едином Кресте Господни, на немже страдав уби страсти. Того убо и мы известно держим, Крест Господень, хвалу вси: есть бо нам спасительное сие древо, оружие мира, непобедимая победа.

Песнь 7. Ирмос:

Безумное веление мучителя злочестиваго люди поколеба, дышущее презрение и злохуление богомерзкое: обаче три отроки не устраши ярость зверская, ни огнь снедаяй, но противодышущу росоносному Духу, со огнем суще пояху: препетыи отцев и нас Боже, благословен еси.

От древа вкусив первый в человецех, в тление вселися: отвержением бо жизни безчестнейшим осудився, всему роду телотленен некий, яко вред недуга преподаде: но обретше земнороднии воззвание Крестным древом, зовем: препетый отцев, и нас Боже, благословен еси.

Разруши повеление Божие преслушание, и древо принесе смерть человеком, еже неблаговременно причастно бывшее: во утверждение же зело честнаго. Оттуду жизни древо возбраняемо бе, еже разбойнику злоумершу отверзе, благоразумно зовущу: препетый отцев, и нас Боже, благословен еси.

Жезла объемлет край Иосифова, будущая зря Израиль, царствия державное, яко возымуществит преславный Крест, проявляя: сей бо победоносная похвала, и свет верою зовущым: препетый отцев, и нас Боже благословен еси.

Песнь 8. Ирмос:

Благословите отроцы, Троицы равночисленнии, Содетеля Отца Бога, пойте снизшедшее Слово, и огнь в росу претворшее, и превозносите всем жизнь Подавающаго, Духа Всесвятаго, во веки.

Воздвизаему Древу, окроплену Кровию воплощшагося Слова Бога, пойте небесныя силы: земных воззвание, празднующе людие, поклонитеся Христову Кресту, имже мiру востание во веки.

Земнороднии дланми, строителие благодати Крест, на немже стояше Христос Бог, возносите священнолепно и копие, Божия Слова Тело прободшее, да видят языцы вси спасение Божие, славяще Его во веки.

Божественным судом предызбраннии веселитеся, христианстии вернии людие хвалитеся победоносным оружием, приемше от Бога Крест Честный: в сем бо колена браней дерзости ищуще, разсыпаются во веки.

На 9-й песни Честнейшую: не поем, но поем припев праздника: Величай, душе моя, Пречестный Крест Господень.

Таже, ирмос 1-го канона: Таин еси Богородице:

И другой лик подобие припев, и ирмос. И к прочим 6 стихам тойже припев поем.

Песнь 9. Ирмос:

Таин еси, Богородице, рай, невозделанно возрастивший Христа, имже Крестное живоносное на земли насадися древо. Тем ныне возносиму, покланяющеся ему, Тя величаем.

Да возрадуются древа дубравная вся, освятившуся естеству их, от негоже изначала насадишася, Христу распростершуся на древе. Тем ныне возносиму, покланяющеся Ему, Тя величаем.

Священный воста рог, и глава всем Богомудрым Крест, имже грешных мысленно стираются роги вси. Тем ныне возносиму, покланяющеся ему, Тя величаем.

Другой припев: Величай, душе моя, Животворящаго Креста Господня воздвижение. И ирмос: Снедию древа:

И другой лик подобне, припев, и ирмос: тропари же 6 с симже припевом.

Ин. Ирмос:

Снедию древа роду прибывшая смерть, Крестом упразднися днесь: ибо праматерняя всеродная клятва разрушися, прозябением Чистыя Богоматере, Юже вся силы небесныя величают.

Горести убийственныя, яже от древа, не оставив Господи: Крестом бо сию совершенно истребил еси. Сего ради и древом услади иногда горесть вод Мерры, прообразующее Креста действо, еже вся силы небесныя величают.

Непрестанно гружаемыя мраком праотца, Господи, Крестом возвысил еси днесь, яко бо лестию весьма неудержанно естество преднизведеся: всеродне ны паки исправи свет Креста Твоего, егоже вернии величаем.

Да образ покажеши мiру покланяемый, Господи, Креста, во всех яко преславный на Небесех изобразил еси, светом безмерным озарен: царю всеоружие непобедимое. тем тя вся силы Небесныя величают.

Катавасия: Таин еси Богородице рай: и Снедию древа: с припевы.

Светилен.

Подобен: Учеником:

Крест, хранитель всея вселенныя, Крест, красота Церкве: Крест, царей держава, Крест, верных утверждение, Крест, ангелов слава и демонов язва.

Слава, и ныне.

Подобен: Жены, услышите:

Крест воздвизается днесь, и мiр освещается: иже бо со Отцем седяй, и Духом Святым, на сем руце распростре: мир весь привлече к Твоему, Христе познанию. Иже убо на Тя надеющыяся, Божественныя сподоби славы.

На хвалитех стихиры, на 4, глас 8.

Самоподобен:

О преславнаго чудесе, живоносный сад, Крест Пресвятый на высоту возносимь является днесь. Славословят вси концы земнии, устрашаются демонския полки. О каковый дар земным даровася, имже Христе спаси души наша яко Един благоутробен. Дважды.

О преславнаго чудесе, яко грозд исполнен живота, понесый Вышняго, от земли воздвизаемь Крест видится днесь, имже вси к Богу привлекохомся, и пожерта бысть до конца смерть. О древо Пречестное, имже восприяхом во Едеме безсмертную пищу, Христа славяще!

О преславнаго чудесе, широта Креста и долгота небеси равна есть: яко Божественною благодатию освящает всяческая. О сем языцы варварстии побеждаются. О сем вера утверждается. О Божественныя лествицы, еюже восходим на Небеса, возносяще в песнех Христа Господа!

Слава, и ныне, глас 6:

Днесь происходит Крест Господень, и вернии приемлют того желанием, и вземлют исцеления души же и тела, и всякия болезни. Сего целуим радостию и страхом: страхом, греха ради, яко недостойны суще: радостию же, спасения ради, еже подает мiру на том пригвоздивыйся Христос Бог, Имеяй велию милость.

И славословие великое тихо и согласно поют.

А о крестном воздвижении, и о поклонении, якоже устав повелевает.

Егда же целуем Честный Крест: поем стихиры самогласны Честнаго Креста, глас 2:

Приидите вернии, Животворящему древу поклонимся: на немже Христос Царь славы волею руце распростер, вознесе нас на первое блаженство, яже прежде враг сластию украд, изгнаны от Бога сотвори. Приидите вернии, древу поклонимся, имже сподобихомся невидимых враг сокрушити главы. Приидите вся отечествия языков Крест Господень песньми почтим. Радуйся Кресте, падшаго Адама совершенное избавление: Тя ныне со страхом христиане целующе, на тебе пригвоздившагося Бога славим глаголюще: Господи, на том пригвоздивыйся, помилуй нас, яко Благ и Человеколюбец.

Глас 5:

Приидите людие, преславное чудо видяще, Креста силе поклонимся: яко древо в раи смерть прозябе, сие же жизнь процвете, безгрешнаго имуще пригвожденна Господа. От Негоже вси язьцы нетление вземлюще зовем: Иже крестом смерть упразднивый, и нас свободивый, слава Тебе.

Глас тойже:

Глас пророк Твоих, Исаии и Давида, исполнися Боже, глаголющий: приидут вси языцы Господи, и поклонятся пред Тобою: се бо людие, иже Твоея, Блаже благодати наполнишася, во дворех Твоих Иерусалима. Крест претерпевый за ны, и воскресением Твоим животворяй, сохрани и спаси ны.

Глас 6:

Четвероконечный мiр днесь освящается, четверочастному воздвизаему Твоему Кресту, Христе Боже наш, и рог верных христиан совозносится. Тем врагов сокрушаем роги, велий еси Господи, и дивен в делех Твоих, слава Тебе.

Пророков гласи, древо святое предвозвестиша, имже древния свободися клятвы смертныя Адам, тварь же, днесь возносиму Тому, совозвышает глас, от Бога просящи богатыя милости: но Единый в благоутробии, безмерный Владыко, очищение буди нам, и спаси душы наша.

Глас 8:

Глас пророка Твоего Моисеа, Боже, исполнися глаголяй: узрите живот ваш висящь пред очесы вашими. Днесь Крест воздвизается, и мiр от лести свобождается, днесь Христово Вокресение обновляется, и концы земли радуются, в кимвалех Давидски песнь Тебе приносяще и глаголюще: соделал еси спасение посреде земли, Боже, Крест и Воскресение: ихже ради нас спасл еси, Блаже и Человеколюбче, Всесильне Господи, слава Тебе.

Глас тойже:

Днесь Владыка твари, и Господь славы, на Кресте пригвождается, и в ребра прободается, желчи и отца вкушает, Сладость церковная: венцем от терния облагается, покрываяй небо облаки, одеждею облачится поругания: и заушается бренною рукою, рукою создавый человека, по плещема биен бывает, одеваяй небо облаки, заплевания и раны приемлет, поношения и заушения, и вся терпит мене ради осужденнаго: Избавитель мой и Бог, да спасет мiр от прелести, яко благоутробен.

Слава, и ныне, глас тойже:

Днесь Неприкосновенный существом, прикосновенен мне бывает, и страждет страсти, свобождаяй мя от страстей, свет подаваяй слепым, от беззаконных устен оплевается, и дает плещи за плененных на раны. Сего Чистая Дева и Мати на Кресте зрящи, болезненно вещаше: увы мне, Чадо Мое, что сие сотворил еси? красный добротою паче всех человек, бездыханный беззрачный являешися, не имея вида, ниже доброты: увы Мне, Мой Свете, не могу спяща зрети Тя, утробою уязвляюся, и лютое оружие сердце Мое проходит: воспеваю Твоя страсти, покланяюся благоутробию Твоему, Долготерпеливе Господи, слава Тебе.

Таже ектении и прочее обычное. И бывает совершенный отпуст.

На Литургии

Антифон 1, псалом 21:

Стих 1: Боже, Боже мой, вонми ми, вскую оставил мя еси.

Припев: Молитвами Богородицы, Спасе, спаси нас.

И паки другий лик, стих 2: Далече от спасения моего словеса грехопадений моих.

Припев: Молитвами Богородицы, Спасе, спаси нас.

И паки 1-й лик, стих 3: Боже мой, воззову во дни, и не услышиши, и в нощи и не в безумие мне.

Припев: Молитвами Богородицы, Спасе, спаси нас.

Таже 2-й лик, стих 4: Ты же во святем живеши, Хвало Израилева.

Припев: Молитвами Богородицы, Спасе, спаси нас.

Слава, и ныне:

Припев: Молитвами Богородицы, Спасе, спаси нас.

Антифон 2, псалом 73:

Стих 1: Вскую, Боже, отринул ны еси до конца?

Припев: Спаси ны, Сыне Божий, плотию распныйся, поющия Ти: Аллилуиа.

Другий лик, стих 2: Помяни сонм Твой, его же стяжал еси исперва.

Припев: Спаси ны, Сыне Божий, плотию распныйся, поющия Ти: Аллилуиа.

Стих 3: Гора Сион сия, в ней же вселился еси.

Припев: Спаси ны, Сыне Божий, плотию распныйся, поющия Ти: Аллилуиа.

Стих 4: Бог же  Царь наш прежде века, содела спасение посреде земли.

Припев: Спаси ны, Сыне Божий, плотию распныйся, поющия Ти: Аллилуиа.

Слава, и ныне: Единородный Сыне: [Оба лика вкупе]

Антифон 3, псалом 98:

Стих 1: Господь воцарися, да гневаются людие.

Таже тропарь: Спаси, Господи, люди Твоя: весь до конца.

Другий лик, тойже стих: Господь воцарися, да гневаются людие, седяй на Херувимех, да подвижится земля.

Тропарь: Спаси, Господи, люди Твоя:

И паки 1-й лик, стих 3: Господь в Сионе велик и высок есть над всеми людьми.

Тропарь: Спаси, Господи, люди Твоя:

Другий лик, стих 4: Поклонитеся Господеви во дворе святем Его.

Тропарь: Спаси, Господи, люди Твоя:

Таже вход. Диакон речет: Премудрость, прости. Мы же входное: Возносите Господа Бога нашего, и покланяйтеся подножию ногу Его, яко свято есть.

Таже тропарь: Спаси, Господи, люди Твоя:

Слава, и ныне, кондак: Вознесыйся на Крест волею.

Вместо же Трисвятаго: Кресту Твоему покланяемся, Владыко, и святое Воскресение Твое славим.

Прокимен, глас 7: Возносите Господа Бога нашего, и покланяйтеся подножию ногу Его, яко свято есть.

Стих: Господь воцарися, да гневаются людие.

Апостол к коринфяном, зачало 125.

Аллилуиа, глас 1: Помяни сонм Твой, егоже стяжал еси исперва.

Стих: Бог же Царь наш прежде века, содела спасение посреде земли.

Евангелие от Иоанна, зачало 60.

Причастен: Знаменася на нас свет лица Твоего, Господи.

На трапезе же бывает утешение братии, от елеа и вина и прочих снедей овощных: сыра же и яиц и рыбы никакоже дерзнем коснутися.

Служба Воздвижению Кресту Господню [20,2 Kb]Скачать zip-файл.

© «Всё о Православных Постах и Праздниках», 2003-2014.
© Православный проект «Епархия», 2001-2014
Яндекс.Метрика Сайт работает под управлением
системы «Экспресс-Веб»
Express-Web - система управления сайтами