|
Месяца октября в 1-й день.
Покров Пресвятыя Владычицы нашея Богородицы и Приснодевы Марии.
На малой вечерни
Стихиры самогласны, глас 1, на 4.
На Вышних Престолех почиваяй Един Бог, превыше земли подал есть видети Своему угоднику, пребожественнеи руце молебно Простирающу, о граде и о людех молящуся Тебе, Владычице. Покрый и ныне, Госпоже, нас омофором милости Твоея.
Град, почитающий Тя и по долгу славящий, покрываеши, Пречистая, Твоим омофором честным, от нахождения противных, от глада же и труса, и междуусобныя брани, Дево Неискусобрачная, Богоневесто, человеков Покров и Заступление.
Палата одушевленная Христова, верным же стена, и покров и держава, Тобою град Твой, Богомати, спасается, Твоею помощию правовернии венчаются, Тобою, хвалящиися присно, победы на поганыя носят: покрываеши бо омофором милости Твоея.
Слава, и ныне, глас 6.
Приидите, празднолюбных собори, Пресвятую Деву воспоим, днесь бо Ангели со святыми празднуют честный Покров Божия Матере и к похвалению нас, земных, призывают вопити непрестанным гласом: радуйся, Церкве чудное Украшение и всему мiру предивный Покров. Радуйся, верным пособие на бранех и воином соблюдение радуйся, Покрове и Заступление наше; Тебе бо христианский род непрестанно блажит.
На стиховне стихиры, глас 2.
Подобен: Доме Евфрафов:
Слава на Небесех и на земли веселие, яко Царица со всеми святыми за вся ны в Церкви молится.
Стих: Слыши, Дщи и виждь, и приклони ухо Твое.
Приидите, вернии, во святую церковь: тамо бо Богородица омофором покрывает люди от всех напастей вражиих.
Стих: Лицу Твоему помолятся богатии людстии.
Пречистая Богородице, не забуди нас, Твоих рабов, но за ны молися, верою поющия Тя.
Слава и ныне, глас 3.
Приидите, вси празднолюбцы, честный Покров Божия Матере ублажим: к Сыну бо руце милостивно простре, и святым Покровом Ея мiр огражден бысть. Темже усты и сердцем и песньми и пении духовными со всеми притекающими празднуим светло.
Тропарь, глас 4.
Днесь благовернии людие светло празднуем, осеняеми Твоим, Богомати, пришествием, и к Твоему взирающе Пречистому образу, умильно глаголем: покрый нас честным Твоим Покровом и избави нас от всякаго зла, молящи Сына Твоего, Христа Бога нашего, спасти души наша.
На велицей вечерни
Блажен муж: антифон 1.
Стихиры Покрова на 4, аще престол на 8, глас 1.
Подобен: О, дивное чудо:
О, великое Заступление печальным еси, Богородице Чистая, скорая Помощнице, спасение мiра и утверждение, милости пучина, Божия мудрости Источниче, мiру Покров: воспоем, вернии, светлый омофор Ея, хваляще неизреченно: Обрадованная, радуйся, с Тобою Господь, подаяй мiру Тобою велию милость.
Дивный прорече Исаия: будет бо, рече, в последняя дни яве гора Господня и дом господень верху горы: увидехом же, Владычице, о Тебе истинное сбытие, горы бо и холми украсишася многоименитыми церквами Твоих праздников. Тем весело вопием Ти: Обрадованная, радуйся, с Тобою Господь, подаяй мiру Тобою велию милость.
О, чудное украшение всем верным еси, пророческое истинное сбытие, апостолом слава и мучеником удобрение, девству похвала и всему мiру предивный Покров. Покрый, Владычице, омофором милости Твоея вся люди, вопиющия: Обрадованная, радуйся, с Тобою господь, Подаяй мiру тобою велию милость.
Ины стихиры, глас 4.
Подобен: Яко добля:
Яко Богонасажденный рай и место Животнаго древа, напаяемо Духом Святым, Тебе, Богородице, сведуще, Творца всех Рождшую, животным хлебом верныя Питающа, Емуже о нас с Предтечею молися, честным омофором покрывающи люди от всякия напасти.
Освящается небо и земля, Церковь же светится и людие вси веселятся: се бо Мати Божия со Ангельскими воинствы, с Предтечею и Богословом, с пророки же и Апостолы, невидимо вшедши, за христианы молится Христу помиловати град и люди, славящия Тоя Покрова праздник.
Доброту Тя Иаковлю и Лествицу Небесную, по нейже Господь сниде на землю, тех же тогда образи Твою честь и славу, Богородице, проявляху. Тя, Рождшую Бога всех, блажат Небеснии Ангели и земнии человецы, яко за весь мiр молишися, покрывающи милостию Твой честный совершающих праздник.
Возсия днесь радостный праздник всечестнаго Покрова Божия Матере: днесь бо Царица и Владычица всех, руце Свои простерши к сыну Своему, молится прилежно, просящи мiра мiрови, покрывающи люди от нахождения иноплеменных омофором милости Своея и, Тобою хвалящеся, победы на сопротивныя просят покрывающеся омофором человеколюбия Твоего.
Слава, и ныне, глас 8.
Срадуются с нами умная вся чиноначалия, духовно совокупльше чувственный лик, видяще Царицу и Владычицу всех многоименне верными славиму: радуются же и дуси праведных, сущие зрителие видения на воздусе молебно простирающу всечестнеи Свои руце, просящу умирения мiру и спасения душ наших.
Вход. Прокимен дне. И чтения три.
На стиховне стихиры, глас 2.
Яко всех вышши сущи Небесных и земных, Херувим славнейши и всея твари честнейши, Тебе, Заступницу и Покров державен, Христианскому роду Христос дарова покрывати и спасати люди согрешшыя, к Тебе притекающия. Темже Прибежище всем, Тебе воспеваем, Владычице, И честный праздник Твоего Покрова празднуем светло, Христа молящи даровати нам велию милость.
Глас 5.
Стих: Слыши, Дщи и виждь, и приклони ухо Твое.
Воспоим, людие, светло Давидскую песнь Отроковице Невесте, Божии Матере всех Царя Христа: предста Царица одесную Тебе, Владыко, рясны златыми одеяна и преукрашена Божественными лепотами. Сию бо, избранную в женах, паче всего мiра удобрив, благоизволи родитися от Нея, великия ради милости, и Сию Помощницу людем Своим дарова строити и покрывати от всякия беды рабы Своя, Едину Благословенную.
Глас 7.
Стих: Лицу твоему помолятся богатии людстии.
Гора еси велика и преславна, паче горы Синайския, Богородице: она бо, не терпящи снития славы Божия во образе и сенех, огнем возгарашеся, и громи и молнии тамо быша. Ты же всего в Себе Божественнаго Огня сущи, Божия Слова во чреве неопально носила еси, манием Носящаго вся, и, Матерне дерзновение к Нему имущи, помози, Владычице, верно празднующим Твой честный праздник и не забуди, милостивно посещающи: прияла бо еси от Бога дар строити и покрывати христоименитое твое стадо, рабы Твоя.
Слава, и ныне, глас 2.
Яко венцем пресветлым, Всечистая Богородице, Покровом Твоим Честным Церковь Божия приодеяся и светится, радующися, днесь, и тайно ликовствует, Владычице, вопиющи Тебе: радуйся, одеяние Честное и венче Божия славы: радуйся, Едина славы совершение и вечное веселие: радуйся, к тебе притекающим пристанище, и Избавление, и Спасение наше.
Ины стихиры, глас 2.
Подобен: Доме Евфрафов:
Доме Евфрафов, палато Царя Небеснаго, всему мiру Покрове и помощь народу нашему.
Граде Божий Небеснаго Царя, покрый град Свой, Покровом милости Твоея, Богородице.
Всех пророк истинное сбытие, Ты еси, Богородице, покрый нас омофором милосердия Твоего, Владычице.
Все упование мое на Тя возлагаю, Мати Божия, сохрани мя под Кровом Твоим.
Таже тропарь, глас 4:
Днесь благовернии людие светло празднуем, осеняеми Твоим, Богомати, пришествием, и к Твоему взирающе Пречистому Образу, умильно глаголем: покрый нас Твоим Покровом, и избави нас от всякаго зла, молящи Сына Твоего Христа Бога нашего, спасти души наша.
На утрени,
по 1-м стихословии седален, глас 3:
Божественными сиянии ангельских воинств обступаема, и с чинми пророк и апостол, честно службу приемлющи, яко Мати Божия, посети нас Твоих раб, молящи Христа Бога нашего, даровати нам велию милость.
Слава, и ныне, тойже.
По 2-м стихословии седален, глас 6:
Безпомощным крепость, Ты воистинну Пречистая Богомати, отсюду смиреннии Тобою возвышаемся, о Тебе высоце держимся: всем Ты еси Покров и к Богу Ходатаица.
Слава, и ныне, тойже.
По полиелеи седален, глас 4:
Яко древняго воистинну пречестнее кивота, Твой пречестный омофор, паче илектра просвещаяся, невещественне, но духовне нетленными Твоими пречистыми руками простираемь, соблюдает милостивно чествующих благоукрашенный праздник Твоего Покрова, Владычце, воньже сошедшеся усердно празднуем.
Слава, и ныне, тойже.
Степенна: 1-й антифон 4-го гласа.
Прокимен, глас 4: Помяну имя Твое во всяком роде и роде.
Стих: Лицу Твоему помолятся:
Всякое дыхание:
Евангелие Луки, зачало 4: Воставши Мариам:
Псалом 50.
Слава: Молитвами Богородицы:
И ныне, тойже:
Помилуй мя, Боже:
По 50-м псалме стихира, глас 8:
Срадуются с нами умная вся чиноначалия, духовно совокупльше чувственный лик, видяще Царицу и Владычицу всех, многоименне верными славиму, радуются же и дуси праведных, сущии зрителие видения, на воздусе молебно простирающу всечестнеи Свои руце, просящи умирения мiру, и царем державы и утверждения, и спасения душ наших.
Канон Богородицы на 12: ирмос по дважды, глас 4.
Песнь 1.
Ирмос: Отверзу уста моя, и наполнятся Духа, и слово отрыгну Царице Матери, и явлюся светло торжествуя, и воспою радуяся Тоя чудеса.
С чинми святых ангел, и с соборы пророк и апостол, в славе велицей, яко Мати Божия днесь в церковь вшедши за христианы молишися, от напасти и печали избавляеши вся, покрывающи твоею милостию.
Скинию Тя Моисей, и жезл Ааронов именова: Ты бо животное Древо Христа процвела еси, к Немуже дерзновение имущи, за ны чествующыя Тя, Царице, помолися избавити нас от всякаго зла: да Твоего Покрова праздник славим.
Не яко пред кивотом древле собрав Давид лики, играет: но паче ныне с чинми святых пред Тобою текуще в церковь, Тебе кланяющеся глаголют: моли за чествующыя Тя люди, да Твой славяще Покров, честно празднуем.
Поют Тя, Богородице, ангельстии чини, и славят патриарси со святители, пред лицем Ти текуще в церковь. с нимиже Тя тогда святый Андрей виде за ны грешныя к Богу молящуюся помиловати люди, славящыя Твоего Покрова праздник.
Катавасиа, ирмос тойже.
Песнь 3.
Ирмос: Твоя песнословцы, Богородице, живый и независтный Источниче, лик себе совокупльшыя духовно утверди, в Божественней Твоей славе венцев славы сподоби.
Клас прозябшая Божественный, яко нива неоранная яве радуйся, одушевленная трапезо, Хлеб Животный вмещшая. Радуйся животныя воды Источниче неистощимый, Владычице.
Твои раби, Владычице, в церкви Твоей верою предстояще, Твоея ожидаем милости: посети наше смирение, и Твоим святым покровом защити императора и люди от всякаго зла.
Многоименитая Дево, пророки проображена честно, иже Тебе ныне со ангелы служат, с нимиже о нас к Богу молися, да Твоего Покрова святый день радующеся вси светло празднуем.
Гедеон Тя руно прообрази, на Тя бо яко роса Христос Бог сниде, к Немуже, Богородице, молися, победу дати императору нашему на враги, да яко мадиамы низложив, прославит святый Твой праздник.
Паче солнечных лучь, твоим блистающим омофором, освещаеши церковь и люди, и тьму грехов наших отгониши посещением Твоим, Богородице, к Сыну Твоему и Богу за ны молящися.
По 3-й песни седален, глас 5:
Теплая Предстательнице и непобедимая, Упование известное и непостыдное, стено и Покрове и пристанище прибегающым к Тебе, Приснодево Чистая, Сына Твоего и Бога моли со ангелы, умирение дати мiру, и спасение, и велию милость.
Слава, и ныне, тойже.
Песнь 4.
Ирмос: Седяй в славе на престоле Божества, во облаце легце прииде Иисус Пребожественный, нетленною дланию, и спасе зовущыя: слава, Христе, силе Твоей.
Во гласех пений, Дево, Тебе вопием Всепетая: радуйся, тучная горо и усыренная Духом. радуйся, свещниче, и стамно манну носящая, услаждающая всех благочестивых чувства.
Паче Аароня кивота, всю Тя Бог освятил есть Духом, Богородице, Святым, и ангелом служити Тебе повеле, с нимиже за град и люди молися, Твой славящих честный праздник.
Прииди ныне в славе в Твою, Богородице, церковь, с соборы всех святых, якоже иногда Тя святый Андрей виде на воздусе светле за христианы молящуюся, и подаждь нам Твою милость.
Укрепи, Владычице, славящаго Тя императора нашего на противныя враги, яко Давида на Голиафа, да Тебе веселящеся вопием: радуйся, Покрове святый, и Заступнице граду нашему.
Тебе припадаем, Госпоже, верою, и покланяющеся благодарно вопием Ти: радуйся, Богоблагодатная Дево, Покрове и ограждение наше, и Помощнице в беде сущым, спаси нас к Тебе прибегающих, на Тя бо надеемся.
Песнь 5.
Ирмос: Ужасошася всяческая о Божественней славе Твоей: Ты бо Неискусобрачная Дево, имела еси во утробе над всеми Бога, и родила еси Безлетнаго Сына, всем воспевающым Тя мир подавающая.
Одр Тя древле Соломон написа, и ложницу Небеснаго Царя, обступаему серафимы, еже о Тебе речеся, Богородице. Тем Тя ныне молим, Мати Божия Всесвятая: покрый нас от всех бед.
Тебе ангелов старейшины, и честнии пророцы со апостолы, яко Матери Божии, честно служат, видяще Тя за мiр молитву творящу: Твоя же прошения послушав Господь, спасает град и люди на Тя надеющыяся.
Великий Тя во пророцех Исаиа прорече, глаголя Бога родити неискусобрачно: Ты бо, чистая Марие, святейши всех была еси, Бога бо во утробе и на руку носила еси. Емуже за ны молися, Твоим осеняющи Покровом верою Тя славящих.
Духовными паряще крилы, святых собори тайно приидоша Тебе послужити, Богородице, видяще Тя на легце облаце славы, ко Спасу Христу молящуюся, подати победу императору нашему, погубити воюющих нас.
Песнь 6.
Ирмос: Божественное сие и всечестное совершающе празднество, богомудрии Богоматере, приидите руками восплещим от Нея Рождшагося Бога славим.
Иерее богомудрии, в церкви Твоей с людьми благочестивыми предстояще, Твоея ожидают, Богородице, милости: премени на радость нашу печаль, Радость бо родила еси, всех человеков грехи Отпустившаго.
Тебе вся земля дары приносит, яко Царице Божии Матери: царие и князи кланяются, и людие вси веселятся, покрываеми от всякаго зла Твоими, Богородице, молитвами.
Гору тя велику Даниил пронаписа: из Тебе бо без семене родися Христос, и сокруши всю демонскую лесть, и всю Своея веры исполни землю, к Немуже за ны, Богородице, молися, славящыя Твоего Покрова праздник.
Ангельский глас взываем Ти, Пречистая: радуйся Престоле Божий, на немже Иезекииль виде Господа, в подобии человека носима херувимы. С нимиже за ны, Богородице, молися, да спасет душы нашя.
Кондак, глас 3:
Подобен: Дева днесь:
Дева днесь предстоит в церкви, и с лики святых невидимо за ны молится Богу: ангели со архиереи покланяются, апостоли же со пророки ликовствуют: нас бо ради молит Богородица Превечнаго Бога.
Икос: Тоя преславных чудес приидите, людие, насладимся: Сею бо Адам от тли избавися, Та бо и ковчег, не Ноем но Богом сотворен бысть. Древле убо Моисей в купине огненней Бога видети не возможе: ныне же от Тоя Рождшагося вся земля знает Сына Божия, к Немуже за ны молится. Сего ради прославляем Ю, яко Божию Матерь: нас бо ради Богородица молит Превечнаго Бога.
Песнь 7.
Ирмос: Не послужиша твари богомудрии паче Создавшаго, но огненное прещение мужески поправше, радовахуся поюще: препетый отцев Господь и Бог благословен еси.
Неисписанная многими пророки, несведома же бысть, Дево, небесными служащими Богу ангелы: ныне же вси вемы Тя Богородицу, и Твоея требуем помощи и заступления, Благословенная.
Гора усыренная Духом, Юже Аввакум виде, точащу верным целебную сладость, Богородице Дево, исцели ны, Сыну Твоему вопиющыя: благословен Бог отец наших.
Преклонивый небеса, в Тя Дево вселися, и ныне на молитву Твою зрит, Богородице Чистая, Твое Царице исполняя прошение: Емуже за ны усердно помолися, на Тя бо надеемся, Благословенная.
Творче Спасе наш Христе Боже, приими молитву Твоея матере, Юже Тебе за ны грешныя приносит, да Тебе радующеся поем: Препетый отец наших Боже благословен еси.
Песнь 8.
Ирмос: Отроки благочестивыя в пещи, Рождество Богородичо спасло есть: тогда убо образуемое, ныне же действуемое, вселенную всю воздвизает пети Тебе: Господа пойте дела, и превозносите Его во вся веки.
С чинми ангел Владычице, с честными и славными пророки, с верховными апостолы, и со священномученки, и со архиереи, за ны грешныя Богу помолися, Твоего Покрова праздник в Российстей земли прославльшыя.
Гордыню и шатания низложи и советы неправедных князей разори, зачинающих рати погуби, о Божия Мати Царице Всечестная: и благочестиваго императора нашего рог возвыси, да Твой праздник славим, Пречистая Богородице Дево, зовуще: Господа воспевайте дела, и превозносите его во вся веки.
Усты приносяще Тебе пение, и душею верно покланяемся: ибо внутрь сердца наша горят. Мати Божия Пречистая, помилуй нас молящихся Тебе, и Господа воспевающих, и превозносящих Его во вся веки.
Многими отягчихся грехи, недоумею по достоянию написати Твоего Покрова, Богородице, похвалы: но яко Мати Божия украси Твой праздник чудесы, да вси радующеся поем Господа, и превозносим Его во вся веки.
Песнь 9.
Ирмос: Всяк земнородный да взыграется Духом просвещаемь, да торжествует же безплотных умов естество, почитающее священное торжество Богоматере, и да вопиет: радуйся Всеблаженная Богородице, Чистая Приснодево.
Высокий Царю, со Отцем седяй и от серафим воспеваемый, призри на молитву Матерню, юже Тебе за ны грешныя приносит, и очисти грехи нашя, спаси град, и люди умножи: даждь императору здравие телесе, и на поганыя победы, молитвами Рождшия Тя.
Ангельский глас вопием Тебе, Дево богоизбранная: радуйся, Яже Адама паки в рай введшая. Радуйся, демоны прогоняющи Твоим именем. Радуйся, Надежде христиан. Радуйся, Освящение душ. Радуйся, Хранительнице града нашего.
Помяни нас во Твоих молитвах, Госпоже Дево Богородице, да не погибнем за умножение грехов наших. Покрый нас от всякаго зла и лютых напастей: на Тя бо уповаем, и Твоего Покрова праздник чествующе, Тя величаем.
Дар от Бога прияла еси яко Мати Божия, всех христиан недуги исцеляти, и от бед избавляти, и грехи отпущати, и от пленения спасати, и всякия нужды. Но и нас не презри, Госпоже: веси бо ихже требуем, здравия телесем, и душам спасения.
Светилен:
Подобен: Жены услышите:
О Пресвятая Госпоже Дево Богородице, покрый нас чудесным Твоим омофором, сохраняя императора и люди от всякаго зла, якоже Тя пречудный Андрей виде во Влахернстей церкви молящуюся: и ныне нам, Госпоже, посли великую Твою милость. [Трижды]
На хвалитех стихиры на 4, глас 8:
Подобен: О преславнаго чудесе!
Тебе припадаем Госпоже, умильно кланяющеся молим Тя: радуйся Богоблаженная Владычице многоименитая Дево, пророки проображенная честно: в Тя бо яко роса Христос Бог сниде, и родила еси Браконеискусная Чистая, и на руку носила еси всех Творца и Господа. Емуже ныне о нас молися славящих верно Твоего Покрова праздник. [Дважды]
Поют Тя, Дево Богородице, ангельстии чини и славят патриарси со архиереи, и святии апостоли, яко Матери Божии честно служат Тебе, видяще Тя за мiр молитву творящую, ко Спасу всех Христу Богу. Емуже помолися, избавити град и люди, славящыя Тя верно, и Твоего Покрова праздник чествующыя.
Паче Аароня кивота, всю Тя Бог освяти, Духом Богородице Святым: и паче солнечных лучь Твоим светящимся омофором освещаеши Церковь и люди и тьму грехов наших отгоняеши: избавляеши же от бед и скорбей верою чествующыя Твоего честнаго Покрова праздник.
Слава, и ныне, глас 6:
Яко виде Тя пречудный Андрей на воздусе, со архангельским множеством, со апостолы и пророки, и множеством мучеников, Сыну Твоему и Богу нашему о граде и людех молящуюся, Владычице, и честным Твоим Покровом покрывающую: не оскудей и ныне, Пречистая, спасти изрядное достояние Твоего Сына, пречестный праздник Твой празднующее, Многопетая.
Славословие великое. И отпуст.
На литургии:
Блаженна от канона, песнь 3-я и 6-я:
Прокимен, песнь Богородицы, глас 3: Величит душа Моя Господа:
Стих: Яко призре на смирение Рабы Своея:
Апостол ко евреем, зачало 320: Имеяше первая скиниа:
Аллилуиа, глас 8: Слыши, Дщи, и виждь:
Стих: Лицу Твоему помолятся:
Евангелие Луки, зачало 54: Вниде Иисус в весь некую:
Причастен: Чашу спасения:
![Служба Покрову Пресвятой Богородицы [11,9 Kb]](/www/icns/zip.gif) Скачать zip-файл.
|
